حضرت زهرا(س)

دوشنده ظاهراً شان و جلالون یاده یازهرا

گوگل مبهوت اولور بو خلقته معناده یازهرا

 

نه عصمتده نه عفّتده نه عزّتده نه شوکتده

گلوب مثلون سنون بو صفحه ایجاده یازهرا

 

سنیله بیر بیر اصحاب کسانی خالق سبحان

تانیتدی جبرئیله عالم بالاده یازهرا

 

کمینه بیر کنیز اولسا سزادور هاجر و حوا

یقین واردور بو حسرت مریم و ساراده یازهرا

 

بشر فرض ایلسم عین خطادور، نور وحدت سن

گوروب کیم بیر بشر بو صورت و سیماده یازهرا

 

سنون تک بیر بلاکش گورمیوبدور دیده ی عالم

گوروب بیر تک سنی بو دامن غبراده[1] یازهرا

 

او گوندن کیم قدم قویدون جهانه گورمدون خوشگون

ملال و غصّه چکدون دائماً دنیاده یازهرا

 

اولوب اون سگّیز ائیل عمرون سنون بو دار دنیاده

باشا ویردون بو عمری یثرب و بطحاده یازهرا

 

آتان پیغمبر رحمت ائیوینده دوقّوز ائیل قالدون

ازلدن اولدون هر بیر محنته آماده یازهرا

 

گلوب دوقوز ائلینده خاندان بو تراب ایچره

گیچیتدون سن همان ایامی سالام یاده یازهرا

 

عم اوغلون راضی اولمازدون سنون دردونله غملنسون

گورنمزدون غم اولسون خاطر مولاده یازهرا

 

او قدری باشداکی چادر شبه، وصله وئرمشدون

که اسباب غم اولموش جمله اوتاده[2] یازهرا

 

گییردون کهنه جامه ، ایلمزدون زیور و زینت

شرافت گورمدون سن جامه دیباده یازهرا

 

پیمبردن صورا قویموب عدو اوچ گون سنه حرمت

قاپون یاندی، جلال و جاه گیتدی باده یازهرا

 

گوگردی قولارون ، سیندی قابورقان جور اعدادن

نولوب بطنونده کی سقط اولدی بو اثناده یازهرا

 

عم اوغلون چکدیلر قولاری باغلی مسجده امّت

دئیوب یانّام او ظلمه رحمسیز دنیاده یازهرا

 

اوزون غش ایلمشدون هوشه گلدون آغلادون یاندون

گیدردون وقریله سن مسجده امداده یازهرا

 

گوروب بو حالی فضّه دوردی گلدی ایلدی نصرت

سنه همدرد اولوب بو محنت عظماده یازهرا

 

گلیدون کربلایه روز عاشورا گوریدون سن

نئجه زینب گزردی هولیله صحراده یازهرا

 

گیدوب گه قتلگاهه مهربان قارداش باشی اوسته

بدن لرزان، همی خیزان همی افتاده یازهرا

 

یازیلمش بیر نفر سید ائیوینده بو کتاب غم

یازان «صافی» دئیر آغلار گلور فریاده یازهرا

 

آدی یوسف، هامی اخلاقی احسن، حسن یوسف تک

ویروبلر نسبتین سندن اولان اولاده یازهرا

 

سنی اوغلون حسینون جانی لطف ایله شفاعت قیل

منه هم حاضرینه هم اونا عقباده یازهرا

صافی(ره)


[1] - غبرا : زمین.

[2] - اوتاد : بزرگان طریقت.