هیأت شیفتگان بقیه الله الاعظم(عج) ارومیه

زبانحال امام حسین(ع) به تیر مسموم

منه قرب حبیبیمندن گتوردون سن پیام ای اوخ

حبیبین اوز یرینده من سنه وئرّم مقام ای اوخ

سنی من آختاریردوم مدّت عمرومده ازلدن

گئچم جاندان حمایت ایلیم قرآن منزلدن

امام ئولدورماقا گلدون خطالی قانلی بیر الدن

اگر چه سن گلونجه چوخ وورولموشدی سهام[1] ای اوخ

منیله منتظمدور[2] انتظام[3] عالم امکان

چیخار منسیز نظامیندن مدار گردش کیهان

شَل[4] اولسون حرمله یوخ جرم سنده قان توکن پیکان

نظام عالمی ایتدون بئله بی انتظام ای اوخ

کماندان رد اولوب اوّل نوای دلنشین ایتدون

گلوب فٌلک النجاتی[5] قان یَمینده[6] گِل نشین ایتدون

دل پر سوزیمی کانون آه آتشین ایتدون

الولاندیردون اودلی سینم اوستونده ضُرام[7] ای اوخ

امامه رسمیدور تابع اولار فعلینده هر مأموم[8]

تقدّم ایلدون ایتدی بو فعلون قلبیمی مهموم[9]

قاباقدان گَلدون اولدون هم اوزون هم ماسوا مغموم

سنه هم ماسوی اللهه منم آخر امام ای اوخ

عجب بیر پیکدون ظاهرده ابلاغ پیام ایتدون

ولی باطنده یارین اوز مقامینده مقام ایتدون

نظام عالم امکانی پوزدون بی نظام ایتدون

وئر قانون اسلامه منیم قانیم نظام ای اوخ

حیاتین علّتی قان ، مرکز تولید قاندور دل

رموز آفرینشدن بو عالمده نشاندور دل

وئریلسه مومنه نسبت مکان لامکاندور دل

شکسته دلده ساکندور خدای لاینام ای اوخ

دگنده قلبیمه عرش خدانی گرچه تیترتدون

و لیکن راضیم ایتدون منی آسوده دینجتدون

حضور یاره دعوت نامۀ محبوبیمی گتدون

یتوشدوم یاخچی کامه اولدی تحصیل مرام ای اوخ

بیوک استادلردن ای «حسینی» اوخ یازان چوخدی

اولاریله قیاس اولسا بو شعرین ارزشی یوخدی

ولی قلبی دَلَر بو سوز باخان سویلر بو سوز اوخدی

منه قرب حبیبیمندن گتوردون سن پیام ای اوخ

نشست ایلر دله سوز گر یازان دل دردمند اولسا

دلیندن دل وئرن مولاسینه بیر رشته بند اولسا

وئرللر بیتینه بیر بیت[10] سوز زهرا پسند اولسا

و إلّا چوخ یازار چوخ شاعر شیرین کلام ای اوخ[11]

حسینی سعدی زمان(ره)