میلاد امام رضا (ع)

نیّر رجاء[1] ایلیوب طلوع آسمان خلقتده بو گئجه

گوز آچوب رضا ، نجمه[2] نون گلی گلشن امامتده بو گئجه

 

دولدوروبدی آفاقی لمعه[3] نور حجّت خالق غفور

مهر عارضوندن اولوب فلق مستنیر[4] و مستغرق سرور

دیده سین آچوب دولدوروب بوتون ماسواللهی عزّت و غرور

کلّ خلقتی غرق ائدوب خدا قُلزم[5] سعادتده بو گئجه

 

جلوه گر اولوب حُسن لم یزل غم سرای دنیاده بی نقاب

تا گوروبدی رخسارینی اولوب منزوی گئدور غربه افتاب

احمد عکسینی گوئیا خدا آق قماطیله ایلیوبدی قاب

مرتضای ثامنده ثبت اولوب مصحف ولایتده بو گئجه

 

عطر زلف دلبند فاطمه ایلیوب حجاز شهرینی ختن

آهوان صحرای التجا مست اولوب هامی مُشک نابیلن

دام عشقینه دوشماقا ائدور صید صیدیلن کشمکش علن

چوخلی عاشق ایستور قدم وورا وادی محبّتده بو گئجه

 

فاضل و رضی ، صابر و وفی ، نور دیده مومنینیدور

اشهر ، عالِم آل مصطفی ، فخر خسرو متّقینیدور

پاک آدی علی ، عزّ و شأنیده مرتضی کیمی بی قرینیدور

نخل بذل و بخشش وئروبدی بَر باغ لطف و رحمتده بو گئجه

 

سنده واردی حیدر دمی دئمم سن نفسده عیسایه چکموسن

بی نظیریسن حسن لم یزل ، حُسنده دئمم آیه چکموسن

حیرته دوشر عارضون گورن چون گورر که طاهایه چکموسن

یاده سالموسان مصطفانی سن عترت نبوّتده بو گئجه

 

ای اولان وجود مقدّسی ماسوایه اوز جدّی تک دلیل

پیک وحی دور خادم دَرین فخر ائلر بو عنوانه جبرئیل

زائر اولسا کیم بارگاهیوه حق آدین یازار عاشق اصیل

نی کیمی نوا ایلیور اورک انتظار وصلتده بو گئجه

 

قویسا کیم یوزون آستانیوه باشینه خدا سایه سین سالار

آهو تک اگر صدقیله دوتا دامنون او دم حاجتون آلار

اوز جوادیوه وئرسه کیم قسم شکّی یوخ یقین کامیاب اولار

قیل کرم آقا چوخلی سائلون وار گوزی عنایتده بو گئجه

 

سن رئوف سن جان فاطمه سائله نظر ایله یا رضا

دل اولوب خراسانه مشتری حسرتون چکر دم به دم آقا

دعوت ایله باب الجوادیده ایلیاخ سلام شاه ارتضا

لطف ائله بو جمعیله «جاهدی» فیض آلا ضیافتده بو گئجه

رحمان جاهدی ارومیه 1391

 


[1] - امید

[2] - مادر حضرت رضا (ع)

[3] - لمعه

[4] - ظلب نور کننده و نور جوینده

[5] - دریای بزرگ