احوالات دفن حضرت زهرا(س) - رفوگر(ره)
احوالات دفن حضرت زهرا(س)
گرایسته سوز تاپاسوز یول علیّ اعلایه
سرشک دیده توکون ماجرای زهرایه
گینه بروزه وئرور گوزسرشک تازه سینی
یقین دوتوبلا سویا فاطمه جنازه سینی
جنازه نی چیخادوب دیشره شاه خیبرگیر
اوجالدی گوگلره فریاد و ناله شبگیر
باتوب ملاله توکوب عارضه سرشگ نجوم
ملائکان سماوات ائدوب یئراسته هجوم
امین وحیه اولوب وحی حیّ اعلادن
گتوردی غسلینه سو چشمه ی مصفّادن
بئله روایت ائدر بو حکایتی ورقه
سالوب روایتی شیون بناسی نه طبقه
دئیر که دورموشودوم پشت درده ناله کنان
سویوندوراندا او مظلومه نی امام زمان
قرار و تاب و توان مهرو ماهیدن آلدی
علی سسی اوجالوب عرشه ولوله سالدی
قاریشدی بیربیرینه اهل بیت پیغمبر
بیر آز سکوت ائلدیم بولمدیم بیراوزگه خبر
خبر همین بوئیدی قیل بو یرده مدنظر
کنارائدنده لباسین گوروندی ظلم عمر
گوروم اولیدی ازلدن بو عالمی نابود
که گورمییدی علی فاطمه قولوندا کبود
دورون ایاقه گیداق جمله فاطمه یاسینا
علی نه چکدی دوشنده گوزی قابورقاسینا
وئروبدی غسل و کفن ایلدی شه کونین
تمام ائدوبدی یتوشدی او حینیده حسنین
چیخوبدی زینب اودم حجله گاه عصمتدن
اورین یتوردی خانم کثرت مصیبتدن
آلوبلا دوره ماه امامی شمس و نجوم
چیخوبدی دیشره او دم گون تک حضرت کلثوم
دوتوبدی دوره ماه وصالی پروانه
یانوبدی فضّه سالوب اود دل و جانه
گل حقیقتی اوخشارغریبه بلبلر
دئدیلر نجه داش آغلادان شیرین دللر
سرشگ دیده توکوب داغ و داشی داغلادیلار
جنازه اوسته اولار سیل اشگی باغلادیلار
زبسکه ناله و فریاد ائدوب حسین و حسن
جنازه بیرحرکت ایلدی آچیلدی کفن
گوگل قنادیلرین ساق عرشیدن آسدی
ایکی بالاسینی آغوشه جان کیمی باسدی
یتوشدی وحی امامه خدای اعلادن
آیر گلن حسنینی بتول عذرادن
محبّتیله آییردی امام کون و مکان
جنازه دن بالالاری به دیده ی گریان
اگرچه رسمیدی ایتامه رحم ایدرهامی کس
حسین یتیمینه رحم ایتمیوبدوله نیه بس
کوچنده کرببلادن جفائیله اسرا
گلوبله قتلگهه کاروان درد و بلا
متاع درد وغمه وئردیله او چولده رواج
آلوبلا عالم معناده نه فلکدن باج
توکدولر دوه لردن مقید و مغلول
نه قید دور که رضائیله ایلیوبله قبول
فراقیدن اوسانانلار تاپوبلا عین وصال
دوزتدی عاشق و معشوق وصلی مجلس حال
آنا بالا باجی قارداشی چکدی آغوشه
اوزاق سفردی گوتور سونله بلکه بیر توشه
«رفوگروز» غم الیندن توکندی جانه گلوب
بو سوزلری قاپوزا ایلیوب بهانه گلوب
رفوگر(ره)