زبانحال زینب(س)در شهادت فاطمه(س) - بهار(ره)
زبانحال زینب(س)در شهادت فاطمه(س)
بهارعیشی ظلمیله خزان اولوب سولان آنا
آزعمریله جهاندا چوخ غمه اولان نشان آنا
نقدری وارنفس گرک سالام خیاله محنتون
آدون دلیمده روزو شب یانوب دئیم مصیبتون
زمانه ده سنین آنا بو چکدیقون اذیّتون
قویوبدی دیده ترمنی ائدوبدی باغریقان آنا
قاپون یانوبدی ظلمیله مصیبتین پدیداولوب
دوشوب شراره قلبیوه آنا غمین مزید اولوب
یتوبدی صدمه محسینون او صدمه دن شهید اولوب
همان او حالی یاد ائدوب قان آغلارام هرآن آنا
گلوب فغانه اوخشارام فراق ایوینده صبح و شام
یانوقلی قلبیله سنه قان آغلارام علی الدوام
اورکده داغ حسرتین غم و ملالیله مدام
اولورعذاره گوزیاشیم روانه هرزمان آنا
غمین ائدوبدی آشنا بو زینبی بلائیله
بو یالقوز ائوده آغلارام غمینده هایهائیله
نقدری واردی منده جان دئیوب بو مجتبائیله
جفای امّتیله وای قاپوسی باغلانان آنا
ائدوبدی چوخ اثرغمین بو ناتوان حسینیوه
اوزون گلوب تسلّی وئر بو باغریقان حسینیوه
باخاندا قلبیم اود دوتوریانوریانان حسینیوه
بو نوعی قویما آغلاسین حسینی مهربان آنا
عزیزیدیم زمانه ده یتوشدی باشه عزّتیم
چتین آنا یوزوم گله سنیله گیتدی حرمتیم
اولار زیاده گون بگون داخی منیم مصیبتیم
زبسکه غم هجوم ائدرایشیم اولوب فغان آنا
نولوربوزینبین آنا ئولیدی سن ئولن گونی
وئریدی قورتولیدی جان سنه کفن ائدن گونی
باشیندا چوخ بلاسی وارقاباقدا بیر گلن گونی
همان او گونده باغلانار بو غملی دودمان آنا
هانی او گونلریم که سن منه نگاهداریدون
سنیله شادمانیدوم غمیمیده غمگساریدون
جهاندا غصّه بولمدیم آنا نقدری واریدون
نه چاره ایندی حالیمه یوخومدی بیر یانان آنا
بلالی زینبم اودورمصیبت آشنالیم
باسیمدا قاره سینه دن یارالیم یارالیم
چتین آچام بو قاره نی ئولنجه من عزالیم
قالار بو قاره تا وارام باشیمدا جاودان آنا
خلوص نیّتیله چون تاپوب طریق معرفت
ایکی جهاندا قیل عطا «بهاره» قدرو منزلت
بو خدمتین قبول ائله نظرده محتشم صفت
آدین کتاب غمده یاز حسینه نوحه خوان آنا
بهار(ره)