وداع امام حسین(ع)

ای نیّر[1] افلاک شرافت آنام اوغلی

خورشید سماوات شهادت آنام اوغلی

 

دفترچه ی خلقتده ازل منشی تقدیر

عنوانیله بیر کلمه یازوب منشأ تحریر

بو کلمه حروف اوسته گله عشق اولی تعبیر

وسعت وئره گر ضیق عبارت آنام اوغلی

 

تک عشقیده دور جمع رموزات جهانی

اوچ حرفینه مخصوصیدور اسرار نهانی

هر حرف اوز اسرارینه بیر شرح معانی

بیر رمزیدی معنادن او صورت آنام اوغلی

 

بس عشقیدی خلقتدن اولان علّت غائی[2]

منظور محبّتدی چه بَدوی چه نهائی

دنیای محبّتده نه شاهی نه گدائی

عشق اهلینه بیردور هامی حالت آنام اوغلی

 

بیر آیینه دور عشق که اوندا کَدر اولماز

هر جلوه سی وار با خبریندن خبر اولماز

هر کیم اثرین گورسه اوزوندن اثر اولماز

سنسن همان آئینه حقیقت آنام اوغلی

 

بیر یاندا که اغیار[3] سنه یار اولار جانی

آئینه ی باقینی گورنده اولا فانی

زینب دگولم گر ایتورم رسم وفانی

امروندن ائدم ذرّه جه غفلت آنام اوغلی

 

گیت لیک یانیش گیتمه ره رسم سفردن

دیل آیینه سین دوتقون اولا قویما کدردن

شهزاده خانم قیزلاریوی سالما نظردن

آغوشیوه آل ایله شفقّت آنام اوغلی

 

قوی سینه سین هجران اودونا داغلیه زینب

بو آیریلیقن سس چکه بیر آغلیه زینب

اگلش یئره باشون یاراسین باغلیه زینب

قیمتلی غنیمتدی بو فرصت آنام اوغلی

ذهنی زاده(ره)

 

 

 

 

 


[1] - نیّر : نوردهنده.

[2] - علّت غائی : غرض و مقصود صانع از صنعت خود. (از ناظم الاطباء). و آن محرک اول فعل است ، و در وجود ذهنی مقدم بر سائر علل است اما در وجود خارجی بعد از تحقق تمام آنها محقق میشود.

[3] - اغیار : دشمنان . مخالفان محبوب - مردمان اجنبی و بیگانه و نامحرم .