جلالت حضرت زینب (س)

مقام زینب کبراده ایسته سن یازاسان

خطا گئدر قلمین بولدوقون سوزی آزاسان

 

سولار مرکّب اولا یا قلم اولا اشجار

یازیلسا آخره یتمز تمام لیل و نهار

 

ائشیتموشم بو سوزی بیر صحیح عالمدن

مبرّزه علمادن عقیده سالمدن

 

تولدنده بونون جبرئیل آدین گتوروب

رسول اکرمه الله دئین آدین گتوروب

 

که ای پیمبر حق وار بو یئرده بیرمطلب

او علّته بو قیزین قویموشام آدین زینب

 

نه چون آتاسی بونون شیر حق داوردی

آدین قویوب علی اعلا بشر مصوّردی

 

او حلم وارثی زینب بتوله وارث غم

امام خطّینی سیر ایلین قدم به قدم

 

بونا برابر اولانماز مقامیده سارا

بونون آناسیدی عالمده عصمت کبرا

 

بو بیر خانمدی که عصمتده فرد عالمدور

حجاب دایره سینده کنیزی مریمدور

 

بونون اسارتی بیر سرّیدور اوزی مکنون[1]

بولنمز علّتینی مینلر اولسا دارفنون

 

اسیریدی ولی احیای دینیدی غرضی

شفاعتی اولونوبدی اسارتین عوضی

 

مقام صبره صدارتدن امتیازآلدی

او قدر صبر ائلدی صبری حیرته سالدی

 

یازوبدی شوشتری روشندی گون کیمی مطلب

بولردی علم غیوباتی حضرت زینب

 

تمام مسجد و منبرده زینبین سسی وار

مگر ائشیتمموسن تلّ زینبیّه سی وار

 

کیمین نه جرئتی وار زینبی اسیر ائلسون

اولار که روبه اولان شیری دستگیر ائلسون

 

ثبات صبرینه کرّوبیان دئدی تبریک

شهادت امرینه بعضیلری یازوبلا شریک

 

بلی اسیریدی سلطان کربلا باشینا

دوشوب او باش دالسیجا گئدردی اوزباشینا

 

رفوگر(ره)

 


[1] - مکنون : پوشیده؛ پنهان‌.