حضرت ابوالفضل(ع) - خوندل(ره)
حضرت ابوالفضل(ع)
ابوالفضله گل ایله عنایت آتام اوغلی
ائدوم بیرده جمالون زیارت آتام اوغلی
ائله حالدیَم من كه مأیوسم اوزومدن
گذشت ایت منی قارداش خلاف اولسا سوزومدن
بو قانی گَل اوزون سیل منیم قانلی گوزومدن
گوروم گُل یوزون اولسون سعادت آتام اوغلی
سو اوسته بولوسَن من نه زحمتلره دُوزدوم
گلن اوخلاری گُل تك یانان سینمه دوزدوم
سو مشكیمدن آخاندا حیاتیمدن اَل اوزدوم
منی ایتدیله سَندن خجالت آتام اوغلی
یارالی گون ایوینده سیزیلدار یارام آغرور
یارالار بدنیمده اوزوم تا وارام آغرور
گَل اَگلش باشیم اوسته دیوم تا هارام آغرور
ائدیم دردیمه بیر بیر اشارت آتام اوغلی
قوری یِردیم امّا یِرون وار گوزون اوسته
نقدری نفسیم وار وارام اوز سوزوم اوسته
اگر عطریوی آلسام سورونَّم یوزوم اوسته
تاپام خاك رهوندن شرافت آتام اوغلی
قالان دشمن اَلینده یارالی باشیم ایوای
آخار قانلی عُذاره یازار گوز یاشیم ایوای
من اَل چكدیم اوزومدن سوسوز قارداشیم ایوای
جسارت تاپار اهل عداوت آتام اوغلی
عجب مقصده چاتدی بو گون قانه باتانلار
كنار اولدولار اوددان كنارونده یاتانلار
نه الله دان اوتاندی نه سَندن اوخ آتانلار
ائدوبلر منه مشكه جسارت آتام اوغلی
گرك قان ایده بو غم سوسوز قیزلارین اشكین
كه انهار بهشتی او اشكین چكه رشكین
سو یوخدی سَن اوزون گَل آپار قانلی سو مشكین
اوزی شَرح ایده سَندن حكایت آتام اوغلی
بو صحراده شدائد نقدر ایلدی شدّت
وفا شیوه سین ائتدیم وظیفَمجه رعایت
بیر اوخ غفلتاً امّا ائدوب مشكه اصابت
سو گیتدی هدر اولدی او زحمت آتام اوغلی
گَل آرتور منه لطفون غم و دردیم آزالسون
رضا اولما فراقین شرر جانیمه سالسون
گَل اگلش باشیم اوسته منیم باشیم اوجالسون
ابوالفضلیوه آرتور فضیلت آتام اوغلی
نه غم گَلدی سو اوسته شهامتله دایاندیم
دیشیمدِیدی سو مشكی بو میدانی دولاندیم
بیر اوخ گَلدی سو گِتدی اوركدن یارالاندیم
منی سالدی اَیاقدان او حسرت آتام اوغلی
حسینیم منی قویما بو اَشرارون اَلینده
دوشوب اود دیله آهِ شرر بارون اَلینده
قالوب بیر یارالی گُل نچه خارون اَلینده
اولوب جسمی سراسر جراحت آتام اوغلی
نه منظوریدی قارداش منه بو یارالی باش
نه قانلی گوزوم آغلار كسلمیش اَله قان یاش
آچار اهل جفا اَل باجیم زینبه قارداش
ایدر صبریمی غارت او غارت آتام اوغلی
اوزوم راهِ وفاده نه غم گَلسه دایانّام
غمیم یوخدی باشیمدان، اَلیمدن یارالانّام
سنی دشمن اَلینده قویوب گیتماقا یانّام
بو غم روحیمه ایلر اذیّت آتام اوغلی
خیامه گَتورم سو منه اولمادی امكان
سوسوز قیزلارا ایله بو احوالیمی اعلان
قصور اولسادا مندن سَن ایت عفویله جبران
كه شایسته دی سَندن كرامت آتام اوغلی
خوندل(ره)