اربعین - ذهنی زاده(ره)
اربعین سیدالشهداء(ع)
شاماتیده سالدیم باشا سودای زیارت
بیر قافله گَتدیم هامی ارباب محبّت
دور قافلۀ عشقیدی اعزاز[1] ائله قارداش
هیهات بو زوّار اولا پیشواز ائله قارداش
قبرون نچه مدّتدی باشیمدِیدی هواسی
هر شام و سحر نی کیمی دلدِیدی نواسی
بوردِیدی بُلوردوم هامونین درده دواسی
بو قانه دونن گوگلومه لطف ایله صفا ویر
بیماریوم آخِر منه دور خاک شِفا ویر
یالقوز نه فقط زینب مظلومه دی بیمار
بیماریدی هر قدر منه همره اولان وار
بیر قافله بیماریوه بیمار پرستار
بیمار سنون، درد سنون، چاره سنوندور
بو جمع پریشان دل و آواره سنوندور
ای قبری سالان حیرته هر قلب سلیمی
محو ایلین انوارینه مین لرله کلیمی
اعلام ایلین قدرت خلّاق علیمی
بو نور اوجالان قبر مگر طوریدی قارداش
نه تک منه، عالم لره منظوریدی قارداش
ای مرقد شش گوشه سی عالمده یگانه
عطری یارادان حسرت دل عطر جنانه
غبطه آپارور عرش خدا قبریوه یا نه؟
عرشین هانی شأنینده بیله رفعت اولِیدی
سن کشتۀ عشقه دولانوب تربت اولِیدی
عشق اوسته یاراتموش سنی خلّاق محبّت
تک عشقیدی یالقوز سنه آب و گِل خلقت
سنسن گر اولا جوهره ی عشق و حقیقت
ای عشق و محبّت سر کویوندا مُلازم
سن اولمیه سن عشق و محبّت نَیه لازم
چوخلار قویوب عالمده قدم جاده ی عشقه
چوخلار اوزادوب همّت اَلین باده ی عشقه
تا رنجه قدم ایلدون آباده ی عشقه
عشق اوسته گیدن قافله دن جاده بوشالدی
قانلی لبِ لعلوندن اُپَن باده بوشالدی
هر ساغر غملر دولوسیدی باشا چکدون
عالمده اولان سر خطه خط بیر باشا چکدون
تا کعبۀ آمالیمیزی داغ داشا چکدون
بو کعبه ده اولاد خلیلون گوزی واردی
بیر آیدی که مین کعبه کیمی اولدوزی واردی
بو کعبه ی آمالیده ای غایت آمال[2]
آمال برآورده دی ، مقبولیدی اعمال
ایّام طوافی شب و روز و مه و هر سال
مدفونی نه لازم دیوله ذات خدادی
بسدور که زیاراتی زیارات خدادی
بیر رونقی وار روضه وین ای روضۀ رضوان
ای رونق بازاری جنان ، حوری و غلمان
مشتاقیدی بو روضیه خازن[3] اولا رضوان[4]
روضنده سنون ای گُل گُلزار بهشتی
بی رونق اولار صحبت بازار بهشتی
دل مرده لری زنده ایدر نکهت[5] قبرون
بیر تازه روان جانه ویرور نزهت[6] قبرون
مین چشمۀ حَیوانه دگر تربت قبرون
باشدان اَیاقا خونِ مقطّر[7]دی بو تربت
پیغمبرین عطریله معطّردی بو تربت
ذهنی زاده (ره)